Epopeja e Vlorës, që i siguroi vendit pavarësinë, filloi në mbrëmjen e datës 11 Qershor 1920. Kryengritësit shqiptarë, sulmuan pushtuesit italianë dhe pas luftimesh të përgjakshme, hynë në Vlorë, duke shthurur mbrojtjen e ushtrisë së rregullt, të armatosur deri në dhëmbë. Sulmi dhe fitoret e vullnetarëve shqiptarë, patën jehonë të madhe përtej Adriatikut. Punëtorët italianë u ngritën në greva dhe demostruan, duke kërkuar nga qeveria pushimin e luftës dhe tërheqjen e ushtrive pushtuese nga Shqipëria. Në skelat e Adriatikut, në Trieste, Ankona, Bari, Brindisi, u bëhej thirrje ushtarëve të mos niseshin në Vlorë. Demostruesit, por edhe ushtarët, që bashkoheshin me ta, përlesheshin me policinë.
Referencat:
Thimi Çollaku / Kalendari i botës shqiptare