Po atë ditë, më 31 Mars 1939, në Kinema “Gloria”, nxënëset e Institutit Femnor të Tiranës dhanë një shfaqje me karakter të theksuar politik që drejtohej kundër fashizmit Italian dhe përkrahësve të tij në Shqipëri. Shfaqja u kthye në një manifestim patriotik brenda në kinema, ashtu dhe nëpër rrugët e qytetit. Shikuesit, artistët dhe turma që i pasoi, bërtitnin “Rroftë Shqipëria”, “Rroftë flamuri”, “Rroftë populli shqiptar”, “Jashtë të huajt”! Ishte pragu i të “Premtes së Zezë”, kur bregdeti dhe qielli shqiptar u mësy nga “Balozi i zi”, i legjendave tona të lashta.
