Në Strugë, më 21 Mars 1865, u lind mjeku dhe patrioti Ibrahim Temo. Pas mësimeve të para në vendlindje, vazhdoi shkollën në Stamboll, ku u diplomua për mjekësi. Ishte një ndër veprimtarët e lëvizjes xhonturke, nismëtar dhe drejtues i Komitetit të parë Xhonturk “Bashkim dhe Përparim”. Për veprimtarinë e tij, u përndoq dhe u dënua me vdekje në mungesë. Ishte një ndër autorët e Programit të Kongresit të Bukureshtit, veprimtar dhe drejtues i shoqërive patriotike “Dituria” dhe “Shpresa”. Një ndihmesë të madhe, dha për ngritjen e shkollave shqipe për mërgimtarët shqiptarë. Ibrahim Temo, kryesoi delegacionin e mërgimtarëve të Kostancës në Kongresin e Bukureshtit, që zhvilloi punimet më 23 Prill 1905, mori pjesë në hartimin e peticioneve dhe memorandumeve në adresë të Portës së Lartë dhe Fuqive të Mëdha ku kërkohej liria e Atdheut dhe të drejtat kombëtare të popullit shqiptar. Në vitin 1914, erdhi si mjek në Shqipëri për të luftuar malarjen dhe sëmundjet e tjera epidemike dhe deri në fund të jetës nuk e ndërpreu veprimtarinë e vet patriotike në mbrojtje të çështjes kombëtare.
Referencat:
Thimi Çollaku / Kalendari i botës shqiptare
You may also like
-
24 dhjetor 1954 lindi Karmine Abate.
-
24 Dhjetor 1876, konferenca e 6 fuqive i përfshiu Kaçanikun, Tetovën, Gostivarin, Kërçovën e Dibrën në një provincë bullgare
-
24 Dhjetor 1917, At Stath Melani; një fat si i Ali Pashë Tepelenës
-
24 Dhjetor 1924 shënohet sot dita e “triumfit të legalitetit”
-
24 Dhjetor 1944, Cane Çalo, (122767) gjashtë numrat e një martiri